Në Tiranë vetëm sot janë zbuluar 7 raste të reja me koronavirus. Pavarësisht rritjes së numrit, në rrugë, sheshe dhe tregje shkelen të gjitha masat parandaluese.
Edhe pse Tirana nuk bën pjesë në hartën e zonave të gjelbra shumë qytetarë kanë neglizhuar çdo këshillë dhe këtë të martë kryeqyteti gumëzhinte nga lëvizjet.
Me dhe pa maska, një numër të konsiderueshëm lëvizjesh kishte dhe në sheshin “Skënderbej”.
Ndonëse nënat dhe fëmijët sipas rregullave të reja duhet të dalin të dielave, kushtet e mira atmosferike kanë bërë që prindërit t’i nxjerrin për argëtim.
Në rrugë dhe sheshe nuk mungoi as mosha e tretë që në këtë situatë pandemie e ka të ndaluar rreptësisht të dalë.
Edhe në tregje kishte një numër të lartë qytetarësh.
Nevojat jetike ka bërë që shumë kush të harrojë rrezikun nga virusi, ndërsa pranohet se masat janë një domosdoshmëri që duhet respektuar
Prej më shumë se 7 javësh kryeqyteti ndodhet në shtetrrethim. Por kjo fillim jave duket se i ka risjellë Tiranës normalitetin e munguar, por numri i të infektuarve vazhdon të rritet. Vetëm këtë të martë janë 7 raste të reja.
