Ilir Selmani i arrestuar për vrasjen e ish-policit Santiago Malko, ka refuzuar të bashkëpunojë me policinë për zbardhjen e ngjarje. Ai ka refuzuar të japë detaje të vlefshme që do ndihmonin hetuesit, duke mohuar lidhjen me vrasjen e Malkos. 35-vjeçari jetonte në zonën e “Xhamllikut”në Tiranë, zonë e cila tashmë është kthyer në strehën e të shumërkuarve.
Ilir Selmani (në foto) i arrestuar pasditen e të enjtes në kryeqytet si autor i dyshuar i vrasjes së ish-policit Santiago Malko, ka refuzuar të bashkëpunojë me policinë për zbardhjen e ngjarjes.
Ai është marrë në pyetje nga grupi hetimor pranë policisë, para të cilëve ka mohuar të ketë lidhje me vrasje, apo të ketë marrë pjesë në planin për ekzekutimin e ish-policit. 35-vjeçari para hetuesve është shprehur ndër të tjera se ngjarjen e kishte mësuar në televizor, dhe se viktimën nuk e njihte. Mes të tjerash, Selmani ka treguar edhe pse dilte i armatosur në rrugë, duke thënë se i rrezikohej jeta nga kundërshtarët e tij.
Arrestimi i ilir Selmanit u krye në kuadër të operacionit të koduar “Gjurmimi” nga efektivët e e komisariatit nr.2 në zonën e Xhamllikut. 35-vjeçari është prangosur në lulishten e pallatit, zonë shumë pranë vendit të vrasjes së Santiago Malkos. Në momentin e arrestimit, Selmanit iu sekuestrua edhe një pistoletë me fishek në fole, ndërkohë që bashkë me të u shoqërua edhe shoku me të cilin ndodhej kur u ndalua nga efektivët e policisë.
35-vjeçari Selmani kishte marrë me qira një hyrje në katin e 8, katin e fundit të pallatit, hyrje e cila disponon dhe dalje në tarracë. E njëjta skemë është përdorur më herët dhe nga i shumëkërkuari tjetër Orges Bilbili, i cili jetonte në katin e fundit të një tjetër pallati, me dalje në tarracë. Banorët në zonën e “Xhamllikut”, shprehen se e njihnin vetëm si fytyre pasi janë shkëmbyer në ambientet e pallatit, por jo si identitet.
Arrestimi i Selmanit u bë pasditen e të enjtes, pas 8 muajsh kërkime si autor i i vrasjes së Santiago Malkos. Identifikimi i Selmanit është kryer nga hetuesit pas këqyrjes së kamerave të sigurisë, ku ai shfaqej duke mbledhur bishtat e cigareve të konsumuara nga Blendi Teta, i arrestuar po për këtë ngjarje.
Për vrasjen mafioze të ish-policit janë vetëm dy të arrestuar, ndërsa ndodhen në kërkim vëllezërit Leonard dhe Elis Duka, Xhoni Nica, Oltian Loka, Aleksandër Maxhaku e Dritan Agaj të gjithë nga Tirana, si dhe Fatmir Hyseni nga Vlora.
