Identifikimi, gjurmimi dhe hetimi i rasteve epidemiologjike me COVID-19 është një punë e vështirë dhe plot sakrificë, që po ndiqet nga 9 grupe pune që janë në gatishmëri 24 orë në 7 ditë të javës. Përmes sakrificës, këmbënguljes e profesionalizmit, pa njohur orare, gjurmojnë çdo ditë rastet në terren, duke bërë të pamundurën për ndërprerjen e zinxhirit të transmetimit të COVID19. Ata tregojnë dhe mënyrën se si veprojnë pas identifikimit të një rasti pozitiv dhe bashkëpunimin që kryejnë me mjekun e familjes.
“Nuk kemi njohur as natë as ditë gjithmonë kemi qenë në terren dhe problemi ka qenë të zbulojmë vatrën dhe më pas hetimin e kontakteve dhe shkëputjen e zinxhirit të infektimit”, shpehet një epidemiologjik.
“Në rast se zbulojmë një të infektuar fillojmë me hetimin e kontakteve dhe të afërmeve, bëhet karantinimi i tyre për 14 ditë dhe më pas ndiqen me rigorozitet dhe në bashkëpunim më mjekun e familje duke bërë raportimin e gjendjes së tyre çdo ditë”, shprehet një tjetër epidemiologe.
Ministrja e Shëndetësisë, Ogerta Manastirliu tha se qytetarët përmes respektimit të masave duhet të vlerësojnë punën e tyre të vështirë në terren.
“Po bëhet një punë organizative nga të gjitha struktura e shëndetësisë në Shqipëri. Kemi 9 grupe që janë duke punuar 24 orë në 7 ditë të javës për të hetuar, gjurmuar dhe identifikuar dhe për të bërë të gjithë hetimin epidemiologjik në terren, që është një punë kolosale me një angazhim maksimal nga struktura tona. Ata janë në terren për të testuar dhe marrë mostra dhe marrë informacionin që sipas të dhënave kuptojmë situatën në terren dhe në bazë të tyre marrim dhe vendimet në lidhje me masat shtrënguese të COVID-19. Deri tani kemi bërë një lehtësim me pikatore shumë të vogël duke zgjeruar fashën e lëvizjes në një limit prej 90 minutash, por asgjë nuk ka ndryshuar nga rregullat e mëparshme”, tha Manastirliu.
