Zbardhet dokumenti i SPAK, prokurorisë së Posaçme Anti-Korrupsion që çoi pas hekurave drejtorin e burgut ‘Jordan Misja’ njohur edhe si 313-ta në Tiranë së bashku me vartësin e tij, shefin e logjistikës me inicialet F.A. dhe E.K. që është përfaqësuesi i dyqanit brenda burgut që u bë shkak për prangosjet. SPAK njofton se hetimet nisën këtë vit pas kallëzimit nga një person lidhur me aferën. Sipas SPAK, drejtori dhe varësi i tij të arrestuar kanë kërkuar shuma të konsiderueshme dhe kanë marrë rreth 550 mijë lekë të personit që kishte dyqanin në ambientet e burgut në këmbim të favoreve për t’i dhënë leje. Në momentin e arrestimit shefit të logjistikës i janë sekuestruar 100 mijë lekë, që sipas SPAK-ut janë përfitim i parregullt nga personi që kishte dyqanin brenda burgut.
