LËVIZJE TEK E DJATHTA/ Garda e “vjetër” e PD gati krijimin e polit të ri

E djathta shqiptare pritet të pësojë lëvizje në muajt e fundit.

Teksa Partia Demokratike vijon e aksionin me Lulzim Bashën në krye, garda e vjetër e PD-së tashmë të përjashtuar nga Basha kanë nisur të lëvizin.

I pari që bëri shkeputjen e madhe ishte Astrit Patozi i cili sot drejton Bindjen Demokratike. Patozi duket i vetëm në këtë sfidë, thënë kjo pasi nuk iu bashkua asnjë prej të “zhgënjyerve”, ndonëse ky i fundit mori pjesë edhe në zgjedhjet e 30 qershorit.

Nga ana tjetër, Rudina Hajdari edhe pse nuk hoqi dorë nga mandati që i dha PD, sot duket e pavendosur. Nuk kanë qenë të pakta rastet kur është aluduar për një parti të re nga ana e saj por gjithçka ka mbetur pezull.

Ajo që po bën jo pak zhurmë ditët e fundit është deklarata e Edvin Kullurit, një prej zërave kritik ndaj Bashës dhe ish anëtar i Këshillit Kombëtar të PD.

Ai thotë se pas 15 marsit do të krijohet poli i djathtë, që sipas tij do t’i sigurojë të djathtës 700 mijë vota, ku do të ftohen të gjithë aleatët e të djathtës.

Veç të tjerash ai shton se në dijeni të kësja lëvizje janë edhe emra të rëndësishëm të larguar nga Partia Demokratike si Astrit Patozi apo Jozefina Topalli.

Topalli pak ditë më parë ka sjellë në vemendje episode nga përplasjet me Ilir Metën gjatë kohës kur ishte kryetare e Kuvendit dhe ka ironizuar një video të Lulzim Bashës teksa fliste për Presidentin.

Duhet thënë se para kësaj, Topalli kishte qendruar në heshtje për zhvillimet politike.

Të gjitha këto lëvizje duket të kenë përfundimin e krijimit të një poli të ri të djathtë, me disa prej të larguarve nga Partia Demokratike që zhgënjimin më të madh duket ta kenë me ish kryetarin e tyre.

ALPEnews.al