Përshpejtohet përhapja e koronavirusit, veçanërisht në Europë. Në Gjermani rastet janë dyfishuar kurse Franca tani është duket se po kthehet në vatër infeksioni e kontinentit të vjetër.
Në Italinë fqinje numri total i viktimave si pasojë e virusit ka shkuar në 41, të shëruar janë 83 ndërsa të prekurit nga infeksioni llogariten në 1700.
Ndërsa alarmi në rajonin e Lombardisë është ende i lartë qeveria Conte ka nxjerrë një tjetër dekret emergjence. Në ‘zonat e kuqe’ do mbeten ende të mbyllura shkollat për të paktën edhe një javë kurse muzetë janë rihapur.
Mbyllja e jashtëzakonshme nga dje e Luvrit në Francë erdhi si rezultat t 130 rateve të konstatuar pozitiv nga testet për koronavirus dhe autoritetet kanë urdhëruar pezullimin e të gjitha aktiviteteve që parashikojnë grumbullimin e më shumë se 5 mijë njerëzve.
Në Britani, ku aktualisht 35 të prekur nga virusi i ri kinez, është rritur alarmi, pavarësisht se kryeministri Boris Johnson thotë se ishulli do ta fitojë luftën me virusin e Wuhan.
Sfida është e njëjtë për të gjithë, ndërsa 87,000 njerëz janë të infektuar në gjithë botën dhe numri i të vdekurveka shkuar në mbi 3,000 nga të cilët më shumë se 2.800 janë regjistruar në Kinë.
Në Korenë e Jugut, vendi i dytë më i prekur nga epidemia, po dezinfektohen deri edhe rrugët në përpjekje për të përmbajtur koronavirusin që në vend ka infektuar pothuajse 4,000 njerëz.
Ndërsa në Iran, sipas shifrave zyrtare, të cilat duhen marë me shumë rezervë, ka 150 viktima, në anën tjetër të Paqësorit, ndërkohë, Shtetet e Bashkuara kanë regjistruar viktimën e dytë dhe rastet e para të infektuar në New York.
Në nivel global janë mbi 89 mijë raste të konfirmuara dhe 3 mijë të vdekur.
Organizata e Kombeve të Bashkuara ka vendosur të ndajë një fond prej 15 milion dollarësh për të ndihmuar vendet më të brishta që po përballen me epideminë teksa vendet e prekura tani janë rreth gjashtëdhjetë në gjithë botën, përfshirë Indonezinë, Brazilin, Nigerinë, Algjerinë, Indinë dhe Meksikën ndërsa gjatë fundjavës, Organizata Botërore e Shëndetit e ngriti nivelin e alarmit në maksimum.
