Në kuadër të ligjit të dekriminalizimit, për dy deputetë të Kuvendit të Shqipërisë është hartuar dhe firmosur kërkesa për heqjen e mandatit të tyre.
Burime të Panorama që kanë parë dokumentin që ka mbërritur në KQZ, thanë se është prokurorja Rovena Gashi që kërkon nga KQZ ndërprerjen e mandatit për deputetin Aqif Rakipi të PDIU dhe Gledion Rahovicën, deputet i LSI.
Por nëse KQZ miraton kërkesën dhe i hap rrugë prokurorisë, kush do futet në Parlament në vend të tyre?
Në listën e LSI në KQZ, pas Rahovicës renditet Silva Caka, e cila pritet të marrë mandatin e deputets. Sakaq, në listën e PDIU, deputete duhet të bëhet Florenca Halili dhe jo kandidatët meshkuj që renditen para saj. Kjo pasi ky subjekt politik, pra PDIU nuk e ka respektuar kuoten per barazine gjinore.
Sipas organit të akuzës, dy deputetët të cilët vite më parë kanë jetuar e punuar në Itali ku janë arrestuar për vjedhje, si dhe kanë përdorur emra të tjerë, kundravajtje të cilat nuk i kanë deklaruar në formularin e dekriminalizimit.
Zbulimi i ndalimit në Itali i këtyre dy deputetëve për vjedhje dhe përdorimi i emrave të tjerë është bërë pasi janë dërguar shenjat e gishtave tek autoritetet italiane dhe Interpol. Keshtu pretendon Prokuroria, raporton “shqiptarja.com”.
