Vladimir Gjuta është arrestuar pranë selisë së Partisë Socialiste, pasi është kapur me një pistoletë të mbushur. Burime për Report Tv bëjnë me dije se Gjuta është kapur pranë zonës së “Dollarit” në kryeqytet, ndërkohë që në pistoletën që kishte është gjetur edhe një plumb në “gojë”.
Fillimisht Vladimir Gjuta është pikasur nga rojet e Gardës, që ishin pranë Selisë së Partisë Socialiste, të cilët më pas kanë lajmëruar efektivët e policisë së komisariatit nr.3 në Tiranë. Gjuta ka qenë duke ecur në trotuar kur është arrestuar nga policia ndërsa në ndihmë të këtyre të fundit kanë ardhur edhe punonjësit e Gardës. Pas arrestimit Gjuta është dërguar në ambientet e Drejtorisë së Policisë në Tiranë, ndërkohë që ndaj tij do të kryhen të gjitha procedurat për veprën penale të armëmbajtje pa leje.
Vladimir Gjuta ka qenë pranë një “exchange” ndërsa në një çantë “Gucci” dyshohet se ai kishte një shumë prej 100-120 mijë eurosh.
Gjuta ka qenë duke lëvizur në trotuar, pro punonjësit e gardës e kanë mbajtur nën vëzhgim për shkak të të kaluarës së tij, dhe në momentin kur i janë afruar për ta ndaluar, Gjutës i ka rënë pistoleta në tokë. Në këtë moment punonjësit e gardës kanë njoftuar policinë ku këta të fundit kanë bërë të mundur edhe arrestimin e Vladimir Gjutës.
Ndërkohë policia ka shkuar për kontroll edhe në banesën e Vladimir Gjutës, por nuk kanë mundur të hyjnë ende brenda për shkak se Gjuta ka thënë se nuk di ku ka çelësin.
