Konfederata e Sindikatave të Shqipërisë i shprehu ngushëllimet familjeve të dy arsimtarëve që ndërruan jetë në një aksident rrugor këtë të premte në në aksin rrugor Memaliaj- Krahës, dhe ngriti edhe njëherë shqetësimin për transportin mësuesve dhe nxënësve, teksa hodhi akuza se tenderët vidhen nga organet ligjzbatuese. Në një reagim pas ngjarjes së rëndë, KSSH i kërkon prokurorisë të “hetojë këto kontrata kolektive dhe të nisë një hetim për tenderët fiktivë për transportin e nxënësve dhe arsimtarëve”.
“Zyra Arsimore Tepelenë duhet të mundësojë transportin e mësuesve dhe nxënësve me furgon ose autobus, por kjo çështje është lënë prej vitesh në harresë. E njëjta problematikë është në 60 bashki të vendit, ku tenderët për transportin janë ndër aferat kurruptive kryesore të zyrave arsimorë dhe institucionet heshtin përballë këtij abuzimi që sot mori 2 jetë njerëzish. Shumë mësues janë të detyruar të japin mësim në zona të thella malore larg shtëpive dhe Zyrat Arsimore i detyrojnë të shkojnë me makinat private. Fondet e parashikuara për transportin e mësuesve vidhen sistematiksht dhe hetimet e nisura nga MAS nuk finalizohen asnjëherë as nga organet ligjzbatuese”, thotë në një reagim Konfederata e Sindikatave të Shqipërisë.
Kjo konfederatë, përmend edhe aksidentin e 19 dhjetorit 2019 në Arrëz të Korçës ku mësuesja Luiza Dule, 48 vjeçe humbi jetën në një aksident rrugor dhe të plagosur mbetën edhe 6 mësues të tjerë. Ata udhëtonin me makinë private, teksa mjeti doli nga rruga dhe mësuesja gjeti vdekjen. Pas kësaj tragjedie, Konfederata e Sindikatave të Shqipërisë, thotë se “i kërkoi Ministrisë Arsimit ti japë zgjidhje çështjes së transportit të mësuesve por premtimi dhe zotimi i Ministrisë Arsimit mbeti në letër”.
“Tenderat fiktive u kopsitën dhe mësuesit ngelën në rrugë të madhe sa me makina private edhe me makina rasti. Përballë këtij skandali sindikatatat që qeveria u ka dhënë leje të mbrojnë të drejtat e arsimitarëve heshtin. Këto pseudosindikata heshtin dhe pse kanë nënshkruar kontratat kolektive me MAS. Heshtja e këtyre sindikatave nëpërkëmb dinjitetin e arsimtarit shqiptar”, përfundon reagimi.
