Ambasadori amerikan në Kosovë, Philip Kosnett zhvilloi një takim me drejtuesit e Lidhjes Demokratike të Kosovës.
Takimi në selinë e LDK-së zgjati rreth 40 minuta dhe bisedimet patën si temë arritjen e marrëveshjes së koalicionit mes LDK dhe LVV.
Në takim mori pjesë edhe ish-shefi i misionit të OSBE-së, William Walker.
Pas takimit Lideri I LDK, Isa Mustafa ishte i vetmi që u prononcua për shtypin.
“Zgjidhjen për krizën duhet ta ofrojë Lëvizja Vetëvendosje dhe jo LDK-ja”, – tha lideri I LDK Isa Mustafa.
Sot Kryetari i Lëvizjes Vetëvendosje, Albin Kurti, i është përgjigjur letrës së fundit të Presidentit të Kosovës Hashim Thaçi. Kurti në letër i shkruan Thaçit se mesazhi i tij i fundit ‘për të krijuar pa vonesë shumicën parlamentare’, në të kundërt ‘t’i hap rrugën opsione të tjera’, përbën ndërhyrje dhe paragjykim të procesit të formimit të institucioneve dhe paralajmërim kërcënues për LVV.
“Lëvizja Vetëvendosje është fituese e zgjedhjeve parlamentare të 6 tetorit 2019. Ne ende nuk ua kemi dërguar Juve propozimin tonë për Kryeministër. Do ta bëjmë këtë në të ardhmen e afërt, me shkresë zyrtare, porsa të jemi gati”.
Kurti shkruan gjithashtu se “Lëvizja Vetëvendosje nuk po e shfrytëzon këtë kohë për të neglizhuar ndërtimin e koalicionit edhe as të cenojë autoritetin e Presidentit, por me qëllim të arritjes së një marrëveshjeje politike që adreson një dakordim për programin qeverisës, zvogëlimin e qeverisë dhe reformat e thella që e presin vendin në muajt e vitet në vazhdim”.
