Një shtëpi është përfshirë nga flakët duke u djegur mëngjesin e sotëm në qytetin bregdetar. Ngjarja ka ndodhur rreth orës 08:30. Bëhet fjalë për një shtëpi private. Në momentin që banesa është përfshirë nga flakët familjarët kanë qenë zgjuar dhe kanë dalë me shpejtësi jashtë duke shpëtuar pa lëndime fatmirësisht.
Në vendin e ngjarjes, në lagjen ‘Partizani’ shkuan tre zjarrfikëse me 10 forca, por flakët shkaktuan dëme të konsiderueshme duke e lënë familjen në qiell të hapur. Zjarri ka nisur në kuzhinë, ndërsa paraprakisht dyshohet se shkak mund të ketë qenë ndonjë shkëndijë elektrike.
Zjarri që ra dhe dogji shtëpinë e Pëllumbesha Braçes në Vlorë rrezikoi edhe banesat e tjera që ishin pranë. Një fqinje e zonjës që iu dogj shtëpia tregon momentet e tmerrit. “Këtu u bë kasaphanë, ulërima. Na nxorën me fëmijë me mbesa, bombola e gazit ishte brenda. Nuk na linte policia të hynim brenda, nxorën fëmijët. Për 5 minuta plasi flaka u dogjëm. Ju lutem shtetit, bashkisë vini dorën në zemër, jemi fukarenj, djali punon me bidona (mbledh kanaçe), burri i ka vdekur. Shikoni fukarenjtë, jo të pasurit. Ndihma ka ardhur për fukarenjtë jo të pasurit” tha ajo.
