Lideri i Vetëvendosjes, Albin Kurti ka refuzuar për të dytën herë ftesën e presidentin të Kosovës, Hashim Thaçi.
Përmes një letre, Kurti i bën me dije Thaçit se nuk mund të shkojë në takim as sonte.
Në letrën në fjalë, e shpërndarë edhe në faqen e LVV-së në Facebook, i pari i Vetëvendosjes ka falenderuar për dy ftesat Thaçin, ndërsa e ka kritikuar që fillimisht i kishte përcjellë te portalet.
“Sot isha jashtë vendit. Nuk do të mund të vij as sonte”, ka thënë ai. Më tej kreu i VV-së ka thënë se për t’u konsultuar për postin e kryeministrit do të takohet me Thaçin ditëve në vijim.
Thaçi ftoi sot dy herë kryetarin e Lëvizjes Vetëvendosje, Albin Kurti, për të caktuar mandatarin për formimin e Qeverisë. Takimi ishte parashikuar që të mbahej në orën 13:30 në kabinetin e Presidentit të Kosovës.
Por Kurti ka refuzuar këtë ftesë me arsyetimin se nuk ndodhet në Prishtinë. Ftesa e dytë ishte bërë për në orën 20:00.
