14 ditë pas tërmetit tragjik që goditi vendin duke lënë 51 të vdekur, mbi një mijë të plagosur dhe shumë dëme materiale, prokuroritë në Tiranë, Durrës, Krujë dhe në Lezhë nisën hetimet, ndërsa gazetari i Shqiptarja.com thotë se prej ditës së djeshme janë marrë në pyetje edhe kolauduesit dhe ndërtuesit.
Një burim i tha gazetarit Elton Qyno se ka shumë mundësi që brenda kësaj jave apo maksimumi javën tjetër mund të ketë arrestime. Hetimet janë shtrirë duke sekuestruar të gjitha dosjet e ndërtimit të objekteve që janë shembur me fokus të veçantë godinat që zunë brenda rrënojave 51 viktimat.
Kryeministri Edi Rama pak ditë më parë deklaroi se janë 60 firma ndërtimi që po hetohen, ndërsa Prokurori i ri i Përgjithshëm Olsian Çela në një vizitë në qytetin bregdetar deklaroi se njerëzit presin drejtësi. “Shumë shpejt do të ketë rezultate të prekshme, do mbajnë përgjegjësi maksimale qoftë zyrtarë e ndërtues” tha ai për mediat.
