E mërkurë, një javë pas tërmetit tragjik të 26 Nëntorit.
Rrugët gëlojnë nga zhurmat e automjeteve që ikin e vijnë.
Por ndryshe nga një javë më parë, syri të zë më shumë automjete civilësh, sirenat e autoambulancave nuk ndjehen si më parë, qyteti ka rinisur të marrë frymë.
Pas ditëve të para të panikut e tmerrit që shkaktoi tërmeti dhe paslëkundjet në vazhdim, qytetarët i janë rikthyer jetës normale.
Me afrimin e mesditës, kur rrezet e diellit ngrohin pak nga pak qytetin, në sheshin para bashkisë, sheh gra e fëmijë që bëjnë shëtitje. Ata duken të qetë.
“Jam banore e vjetër e qytetit të Durrësit, jetoj në lagjen nr.2 “Sefer Efendiu”. Nuk kemi pasur dëmtime, por ditët e para u strehuam tek të afërmit pasi kishim frikë nga lëkundjet e tërmetit”, tregon një grua e re e cila shtyn përpara karrocën e fëmijës së vogël.
Në shëtitoren e “Vollgës” ka gjallëri. Kafenetë në dy anët e rrugës jaë të mbushur plot, po ashtu dhe baret e lokalet pranë qendrës.
Bizneset duken të kënaqur, me rikthimin e normalitetit në qytet dhe puna e tyre është rritur.
“Kemi ardhur nga Kavaja të takojmë njerëzit tanë këtu. Falë zotit janë mirë”, thotë një qytetar.
Bashkë me vajzën e mbesën po fiksojnë me aparatin e celularit një foto familjare. “Ta kemi kujtim për të mos haruar këto ditë”, thotë ai.
Durrësin nuk e kanë lënë vetëm as të rinjtë. Në bare sheh vajza e djem të rinj teksa i gëzohen ditës. Shtyerja e mësimit ka qenë një mundësi e mirë për t’u mbledhur bashkë të gjithë.
Mbrëmja po bie në qytet. Rrugët po zbrazen, duket se i ftohti i dhjetorit i ka mbledhur shpejt në shtëpi.
Nesër do të jetë një ditë e re, me plot shpresë për më shumë ditë të mira.
