Përfaqësuesi Special i Sekretarit të Shtetit, Mathew Palmer, ka vizituar sot Prishtinën, ku ndër të tjera ka folur edhe për çështje që ndërlidhen me dialogun ndërmjet Kosovës dhe Serbisë.
Palmer gjatë një bashkëbisedimi në Bibliotekën Kombëtare në Prishtinë me studentë, ka folur edhe për shumë pikëpyetje që janë ngritur rreth çështjes nëse ka ndonjë mospajtim në mes të Departamentit të Shtetit dhe Shtëpisë së Bardhë, duke qenë se Donald Trump kishte marrë vendimin që të emërojë Richard Grenell si Përfaqësuesin Special Presidencial për dialogun ndërmjet Kosovës dhe Serbisë ndërkohë që vetëm një muaj më parë Sekretari i Shtetit Mike Pompeo kishte marrë vendim për emërimin e Palmer si Përfaqësues Special për Ballkanin Perëndimor.
Palmer gjatë bashkëbisedimit ka pohuar se Shtetet e Bashkuara të Amerikës janë një vend shumë i madh, dhe nuk është problem për Washingtonin që për një problematikë të tillë siç është ajo mes Kosovës dhe Serbisë të caktojë dy Përfaqësues Special.
