Në Ditën Ndërkombëtare të Veprimtarive për Klimën, Bashkia e Tiranës përmes Agjencisë së Parqeve dhe Rekreacionit, si një institucion shumë pranë nevojave mjedisore dhe gjithmonë në mbështetje të aktiviteteve ndërgjegjësuese, sjell më 24 dhe 25 tetor ora 10:00 në bashkëpunim me autorin dhe regjisorin Anderson Gurra, shfaqjen teatrale “Zoti Plastika”, në Amfiteatrin e Tiranës.
Përmbyllja e këtij aktiviteti do të vijë nëpërmjet një bashkëbisedimi mes fëmijëve, personazhit të Zotit Plastika dhe një specialisti nga Qendra Burimore e Mjedisit si dhe mbjellja e luleve sezonale nga fëmijët të ndihmuar nga specialistët e gjelbërimit të APR. Dita Ndërkombëtare e Veprimtarive për Klimën synon të rrisë ndërgjegjësimin e njerëzve në organizimin e veprimtarive sensibilizuese për ndryshimet klimatike në mbarë botën. Për herë të parë kjo ditë u vendos në 2009-ën nga organizata “350.org”.
Kjo ishte fushata e parë globale për një çështje shkencore. Qëllimi i Ditës Ndërkombëtare të Veprimeve për Klimën në vitin 2009 ishte ndikimi te delegatët e Samitit të Konventës Kuadër të Kombeve të Bashkuara për Ndryshimet Klimatike, që do të mbahej në dhjetor 2009.
