Policia dhe Prokuroria e Lezhës nisin verifikimet për biznesmenin turk Nedin Akyuz, njëherazi edhe pronari i jahtit luksoz tashmë i bllokuar nga grupi hetimor në portin e Shëngjinit.
Burime pranë Policisë së Shtetit pohuan për Report Tv se pavarësisht dëshmive dhe pretendimeve që biznesmeni ka dhënë për hetuesit të cilat i siguroi ekskluzivisht Shqiptarja.com në lidhje me gjithçka dinte rreth lëvizjeve të kapitenit të jahtit, turkut Sevgin Yavuz si dhe bisedat e fundit që ka pas me të, hetuesit po verifikojnë ndonjë konflikt të mundshëm mes tyre.
Ky fakt për hetuesit shton edhe më tej misterin e zhdukjes së të riut turk nga bordi i mjetit që ai drejtonte. Po ashtu, verifikime po kryhen edhe për vërtetësinë e deklarimit që kapiteni kishte kryer në portin e Tivarit në Malin e Zi, se në bord ndodhej i vetëm dhe destinacioni final i tij do të ishte ishulli i Korfuzit në Greqi.