Ndonëse disa orë pas vrasjes së ish-policit Santjago Malko, burime nga Policia e Tiranës thanë se kishin identifikuar dy autorë të dyshuar, duket se gjithçka është kthyer në pikën “0”.
Nga veprimet hetimore ka dyshime se atentatorët e 26- vjeçarit Malko të jenë vrasës me pagesë. Nga ana tjetër, nga verifikimi i automjetit tip “Mercedez Benz”, që u gjet i djegur pas atentatit në fshatin Ferraj, Policia ka zbuluar se ishte vjedhur para një viti në Lezhë.
Madje pronari i makinës kishte bërë denoncim për vjedhje në Policinë e Lezhës. Ndërsa targat që i ishin vendosur makinës, nuk përkojnë me targat reale të saj.
Nga verifikimi ka rezultuar se edhe targat i ishin vjedhur një tjetër automjeti në Krujë. Të gjitha këto detaje dëshmojnë për një krim të planifikuar dhe të organizuar prej kohësh nga ana e atentatorëve dhe e porositësve të krimit.
HETIMI
Dy pistat kryesore ku i ka përqendruar hetimet Policia për zbardhjen e vrasjes së ishefektivit Santjago Malko, janë hakmarrja dhe larja e hesapeve. Kjo, nisur nga e shkuara e tij, pasi dyshohet si i përfshirë në disa ngjarje kriminale në Tiranë dhe në Durrës. Grupi hetimor po verifikon tri ngjarje kriminale, ku 26-vjeçari dyshohet të jetë përfshirë.
Burime nga grupi hetimor thanë një ditë pas ngjarjes se nisur nga provat e grumbulluara në vendngjarje, dëshmitë, por edhe rindërtimi i skenës së krimit, rezulton që në vrasjen e Malkos të kenë marrë pjesë disa autorë. Duke nisur nga persona që mund ta kenë mbajtur nën vëzhgim, atentatori që ka shkrepur armën, ai që ka drejtuar makinën, e cila dyshohet t’i ketë prerë rrugën mjetit “BMW X5” të ish-policit, por edhe persona të tjerë që kanë djegur makinën tjetër, e cila u gjet e djegur në fshatin Ferraj.
Në këtë makinë janë gjetur dhe sekuestruar 2 armë automatike, që dyshohet të jenë përdorur në krim. Aktualisht armët janë dërguar për ekspertim në Laboratorin e Kriminalistikës. Në vendin e ngjarjes janë gjetur dhe sekuestruar 10 gëzhoja, që dyshohet se i përkasin një arme zjarri automatike.
Ndërsa nga këqyrja e makinës ka rezultuar që drejtimi i qitjes së armës ka qenë në krahun e majtë të makinës, pra nga krahu i shoferit. Malko ndodhej i vetëm në makinë, duke lëvizur nga rrethrrotullimi pranë “Kinostudios”, në drejtim të kryqëzimit të “Oxhakut”, në rrugën “Xhanfize Keko”.
Tri ngjarjet ku u dyshua se u përfshi Malko
Ngjarja e parë ku është përfshirë Santjago Malko, është ajo e vitit 2016, ku ai u përfshi në një konflikt me dy vëllezër në rrugën “Islam Alla”, të cilët janë marrë në pyetje nga Policia. Megjithatë duket se “hesapet” mes tyre për konfliktin e tri viteve më parë, ishin mbyllur. E dyta është ngjarja e 4 tetorit të vitit të kaluar, në zonën e ish-Bllokut, ku mbeti i vrarë një person e u plagosën dy të tjerë. Kamerat e sigurisë e kishin fiksuar Malkon në lokalin ku ndodhi ngjarja dhe për këtë arsye ai u shpall në kërkim policor. Ndërsa ngjarja e tretë është një atentat i ndodhur në Durrës, për të cilin grupi hetimor nuk jep më shumë të dhëna, por sqaron se është i ngjashëm me atentatin ku mbeti i vrarë vetë Malko, mbrëmjen e së martës, në Tiranë.
