Prokurorët e Nju-Jorkut janë zotuar se do të hetojnë deri në fund akuzat ndaj ish-financierit, Jeffrey Epstein, për trafikim dhe shfrytëzim seksual të të miturave.
Të shtunën e kaluar, 66-vjeçari u gjet i vdekur në qelinë e burgut me vertebrat e qafës të thyera si pasojë e vetëvrasjes me mbytje.
Multimiliarderi akuzohej se në vitet 2002 deri 2005 kishte shfrytëzuar vajza të moshës mbi 14 vjeçe për qëllime seksuale nëpërmjet një rrjeti të mirëorganizuar kriminal.
Klientët që kërkonin shërbimet dhe dëfrimet e shfrenuara me të ashtuquajturat “skllave seksi” ishin persona me pushtet në të gjitha sferat e jetës.
Sipas padisë së njërës prej viktimave, mes tyre renditeshin ish-senatori George Mitchell, ish-guvernatori i Nju-Meksikos Bill Richardson, shkencëtari Marvin Minks, miliarderi Glen Dabin, madje edhe princi britanik Andrew, vëllai i princit Charles.
Pallati mbretëror dhe personat e përmendur i kanë mohuar në mënyrë kategorike pretendimet.
Epstein ishte i njohur për shoqërinë e tij të gjerë me filantropë, politikanë dhe individë të klasës së lartë.
Presidentët Donald Trump dhe veçanërisht ish-paraardhësi i tij Bill Clinton janë fotografuar disa herë në shoqërinë e të ndjerit, por dy krerët e shtetit kanë thënë së fundmi se nuk komunikonin më prej vitesh.
Ndërsa mbeten të dyshimta rrethanat e vdekjes së Epstein pasi edhe kamerat e sigurisë në burg ishin fikur në momentin e ngjarjes, prokurori i përgjithshëm i vendit ka premtuar drejtësi për viktimat e abuzimit seksual dhe ndjekjen penale të bashkëpunëtorëve të tij.
