Kinemaja shqiptare humbi një nga bijtë e saj më të talentuar. Gjergj Xhuvani u nda nga jeta të merkuren e 14 gushtit në moshën 56-vjeçare, për shkak të një ataku kardiak në Romë ku kishte shkuar për të montuar filmin e tij të fundit.
Regjisori i dhuroi publikut shqiptar momente të paharrueshme kinematografike në të dyja epokat, edhe pse siç kolegët rrëfejnë, kulmin e arriti pas viteve ’90. Qe i parë që me “Parullat” e Ylljet Aliçkës bëri të mundur që filmi shqiptarë të prekte një skenë të madhe ndërkombëtare, si ajo e Festivalit të Kanës.
Kolegë e miq, të tronditur nga ndarja e parakohshme nga jeta e njeriut dhe kineastit të madh, e kujtojnë Gjergjin përmes veprave të tij dhe fragmenteve jetësore.
Të shumtë janë ata që e kanë shprehur trishtimin e dhimbjen edhe përmes rrjeteve sociale. Lexoni disa nga postimet prekëse:
