Gjykata e Krimeve të Rënda ka lënë në burg dy nga të arrestuarit të cilët u ndaluan me akuzën e gjobëvënies prej 50 mijë eurosh ndaj një biznesmeni me banim në Durrës.
Lulzim Zalla dhe Klodian Estrefi do të vijojnë të qëndrojnë në qeli, ndërsa masë sigurie më e lehtë, ajo e detyrim paraqitjes është dhënë për Egi Shullazin.
Në seancën e të shtunës avokatët e të arrestuarve kanë mohuar që klientët e tyre të kenë kërcënuar biznesmenin, duke pretenduar se kallëzuesi ishte ai që kishte një shumë borxhi dhe se nuk është kërcënuar në asnjë formë nga klientët e tyre për këtë shumë.
Lidhur me këtë rast mësohet se prokuroria ka dhe përgjime dhe një pjesë të këtyre i ka paraqitur në seancën gjyqësore, nga ku kërkoi arrest me burg për dy nga të pandehurit.
Prokurori Behar Dibra ka kërkuar ndryshimin e masës së sigurisë vetëm për Ergi Shullazin, pasi në analizë të provave dhe faktet e deritanishme nuk është e qartë nëse ka qenë i përfshirë.
Gjatë operacionit policia sekuestroi dhe 5 mijë euro të cilën e kishin vënë si këst të radhës për t’u paguar nga biznesmeni.
3 të pandehurit u arrestuan pak ditë më parë pasi akuzoheshin se në bashkëpunim me njëri – tjetrin me anë të kanosjes dhe dhunës, kanë shtrënguar për dhënien e një pasurie prej 50 000 eurosh, shtetasin N. L., banues në Durrës.
