Qyteti 2400-vjeçar i Beratit, i njohur jo vetëm për bukurinë e tij të rrallë, por edhe për mikpritjen, vazhdon të zgjojë interesin e turistëve të huaj, të cilët kanë qenë të shumtë dhe gjatë këtij këtij viti.
Numri i turistëve që vizituan qytetin e Beratit gjatë muajit korrik 2019 ishte rreth 1300 vizitorë më shumë se korriku i vitit 2018. Ndërsa periudha janar- korrik 2019 është mbyllur me 70648 vizitorë.
Një rritje të ndjeshme ka patur edhe numri i turistëve të huaj të cilët kryesisht kanë qenë Gjermanë, Italianë, Bullgarë, Francezë, Sllovenë,Amerikanë, Spanjollë etj.
Turizmi në Berat ofron një panoramë të shumëllojshme me vende atraktive të cilat mund t’i shijosh në çdo muaj të vitit.
Qyteti i Beratit është një dëshmi e pasurisë dhe e diversitetit të trashëgimisë urbanistike dhe arkitektonike.
Në vitin 1961 Berati u shpall zyrtarisht qytet-muze. Sot Berati trashëgon 210 objekte muzeale, nga të cilat 150 janë objekte në këmbë. Prej tyre 60 janë monumente të kategorisë së parë dhe të tjerat të kategorisë së dytë.
Midis këtyre vlerave, nga më të spikaturat janë: Kështjella, ose kalaja, siç quhet nga beratasit, është ndërtuar mbi kodrën shkëmbore në formë trekëndëshi, me perimetër të mureve 1440 m, me 24 kulla e me dy porta.
