Presidenti i Republikës, Ilir Meta, vijon betejën e tij me qeverinë duke kthyer një tjetër ligj të miratuar në Kuvend. Kreu i shtetit i ktheu maxhorancës për shqyrtim në Kuvend ligjin “Për planifikimin dhe zhvillimin e territorit”, të ndryshuar me argumentin se neni 8 i ligjit i paraqitur për shpallje, është jo i plotë dhe i paqartë në formulim.
“Nga shqyrtimi rezulton se nuk është konsultuar me ministritë e tjera që lidhen me përmbajtjen dhe efektet e aktit apo me grupet e interesit.
Neni 8 i ligjit nr. 42/ 2019, i miratuar nga Kuvendi i Shqipërisë, ka parashikuar disa shtesa në nenin 48 të ligjit aktual nr. 107/2014 “Për planifikimin dhe zhvillimin e territorit”, të ndryshuar, të cilat rregullojnë procesin e ndryshimit të projekteve ndërtimore gjatë fazës së zbatimit të tyre. Këto dispozita aplikohen si për investime publike shtetërore, ashtu dhe për investime me karakter privat.
Presidenti i Republikës çmon se neni 8 i ligjit nr. 42/2019, i paraqitur për shpallje, është jo i plotë dhe i paqartë në formulim. Sipas kësaj dispozite, në procesin e rishikimit të projektit nuk parashikohet dhënia e pëlqimit apo konsultimit me pronarët e trojeve, mbi të cilin realizohet vepra. Për këtë shkak, zbatimi i këtij neni, sipas formulimit aktual, mund të sjellë aplikim të gabuar në praktikë apo keqinterpretim me pasojë cenimin e parimit kushtetues të sigurisë juridike dhe të interesit publik”, sqaron kreu i shtetit në argumentet për kthimin e ligjit.
Sipas Presidentit, neni 8 i ligjit mund të sjellë konflikt të vazhdueshëm midis sipërmarrësve apo investitorëve me pronarët e pasurive pronë private, mbi të cilat realizohet ndërtimi/vepra.
“Ndryshimi i projektit gjatë zbatimit të tij sjell ndryshim të veprës që po ndërtohet, është e nevojshme që ligjbërësi, në këto ndryshime ligjore, të mbajë parasysh edhe rregullimin e procedurës së rishikimit të lejes së ndërtimit dhe projektit, me qëllim që ky proces të shoqërohet me pjesëmarrjen dhe shprehjen e vullnetit edhe të pronarit të pasurive pronë private, mbi të cilin ndërtohet vepra”, sqaron Presidenti.
Ndërkohë, kreu i shtetit dekretoi ndryshimet në ligjin për mbrojtjen e faunës, marrëveshjen e Ministrisë së Financave dhe FSHZH me KfË Frankfurt Am Main për furnizimin me ujë të zonave rurale si dhe ligjin për mbrojtjen e shëndetit nga produktet e duhanit.
