Pas rreth 90 minutash në Prokurorinë e Krimeve të Rënda, kreu i PD-së, Lulzim Basha ka deklaruar për median se ka dhënë gjithë informacionin e plotë lidhur me cëshjet për të cilën u thirr për të dëshmuar para prokuroreve belge per çeshtjen “Toyota Yaris”.
Pa dhënë asnjë detaj rreth asaj që kishte dëshmuar para prokurorëve, Basha ka thënë se “dëshmia mbetet në kuadër të rregullave të drejtësisë shqiptare.
Ne deklaraten e tij para mediave, Basha tha:
“Sot në pranga duhet të ishte Taulant Balla. Pastrimi i parave të drogës dhe krimit është rreziku kryesor që i kanoset sot Shqipërisë. Është rrezik politik, ekonomik, shoqëror dhe për stabilitetin e vendit. Edi Rama dhe qeveria e tij janë vënë në shërbim të pastrimit të parave të pisëta të krimit. Të gjitha koncesionet dhe projektet e qeverisë janë pastrim parash të drogës dhe të krimit. Projekti i stadiumit është pastrim parash. Projekti i teatrit është pastrim parash. Projekti i Unazës është pastrim parash”.
Ai ka leshuar akuza konkrete per Ramen, teksa e ka cilesuar nje hajdut psiqik.
“Edi Rama është një hajdut psiqik që ka vetëm një ideal, një aspiratë, një moral: paranë. Për para po grabit dhe shet gjithë Shqipërinë. Për para bën aleancë me krimin dhe me çdo kënd. Ne do ta ndalim. Ne do të ndjekim dhe gjurmojmë çdo qindarkë që Edi Rama dhe kriminelet po mundohen të futin në ekonomi. Çdo koncesion, çdo ndërtim, çdo kontratë do të gjurmohet për çdo qindarke, si për ata që e kanë dhënë edhe ata që e kanë marrë.
Lufta kundër pastrimit të parave do jetë prioritet kombëtar”- tha Basha.
Kujtojme se një grup prokurorësh federalë belgë erdhen në Tiranë për të asistuar në hetimet që po kryhen për çështjen e “Toyota Yaris”, çështje për të cilën u pyet sot edhe kryetari i Partisë Demokratike, Lulzim Basha.
Zyrtarisht, Prokuroria tha se kreu i PD-së do të japë shpjegime për denoncimin që bëri në Kuvend, dy ditë para se të bllokoheshin në portin e Durrësit automjetet që vinin nga Belgjika, në të cilat ishte fshehur shuma prej 3.4 milionë eurosh.
Ai pritet të japë shpjegime se cili ishte burimi i informacionit. “Përfaqësuesit e Prokurorisë Federale të Belgjikës kanë mbërritur në Shqipëri, me qëllim vijimin e kryerjes së veprimeve procedurale të kërkuara dhe të lejuara nga autoritetet gjyqësore shqiptare. Këto veprime konsistojnë në marrjen në pyetje të personave të pandehur, si dhe marrjen në pyetje të shtetasit Lulzim Basha ditën e ditën e enjte, datë 25 korrik 2019”, njoftoi zyrtarisht Prokuroria.
HETIMI
Prej disa muajsh autoritetet belge po hetojnë paralelisht me autoritetet shqiptare për të zbuluar personat e përfshirë në pastrimin e parave. Aksioni për bllokimin e eurove u finalizua më 24 qershor të vitit të kaluar dhe pati disa të arrestuar, por edhe disa të tjerë që u shpallën në kërkim.
Paratë ishin fshehur në dy nga shtatë makinat tip “Toyota”, që ishin blerë në Belgjikë. Policia arrestoi pesë persona, ndërsa në kërkim janë shpallur dy kushërinjtë Alfred dhe Elvis Vladi. Disa ditë më parë, Njësia Hetimore pranë Task-Forcës Speciale Qendrore, në Departamentin e Policisë Kriminale, nën drejtimin e Prokurorisë për Krime të Rënda dhe në bashkëpunim me Agjencinë për Administrimin e Pasurive të Sekuestruara dhe të Konfiskuara, zhvilloi fazën e dytë të operacionit policor “BIZARK” për veprat penale “Pastrimi i produkteve të veprës penale ose i veprimtarisë kriminale”, në bashkëpunim dhe “Grup i strukturuar kriminal”, faza e parë e të cilit është finalizuar në datën 24.6.2018. Në këtë kuadër u bë ekzekutimi i vendimit të Gjykatës, duke vënë nën sekuestro preventive disa pasuri të luajtshme dhe të paluajtshme të shtetasve në hetim për çështjen “Toyota Yaris”.
BASHA NË PROKURORI
“Kryetari i opozitës është shprehur i gatshëm për të ndihmuar me informacionet që disponon në zbardhjen e lidhjeve kriminalo-politike në aferën e pastrimit të miliona eurove me garanci politike të përfaqësuesve më të lartë të kupolës së Rilindjes”, thanë dy dite me pare burime nga Partia Demokratike.
