Në saj të kontrolleve që po ushtrohen në vijën bregdetare të Shqipërisë kundër informalitetit, një tjetër subjekt është bllokuar nga institucionet ligjzbatuese shqiptare pasi punonte totalisht në shkelje me ligjin. Subjekti në fjalë është një hotel në zonën e Durrësit ‘Festim Hotel’ në rrugën Teuta dhe është në pronësi të Festim Allajbeut që punonte në mënyrë informale.
E kontaktuar nga Report TV, Suela Bala nga task-forca në Drejtorinë e Përgjithshme të Tatimeve ka thënë se hoteli në fjalë që kishte 28 dhoma dhe 5 kate, edhe pse ndodhej në listën e ‘Booking’ ishte e pa regjistruar dhe pa NIPT. Në kuadër të këtij aksioni anti-informalitet që është ndërmarrë në javën e fundit në të gjithë vendin në sitë janë shumë hotele të cilat rezultojnë në ‘Booking’ por që nuk janë regjistruar.
Ky aksion vjen pak kohë pas deklaratave të forta të kryeministrit Edi Rama në prezantimin e drejtoreshës së re të Tatimeve. Vetë Rama është shprehur se nuk toleranca do të jetë Zero për kedo që mundohet që të dalë mbi ligjin. Po kështu ditën e sotme Ministrja e Financave dhe Ekonomisë Anila Denaj ishte në Gjirin e Lalzit në kuadër të aksionit anti-informalitet. Denaj informoi se janë evidentuar disa sektorë, të cilët paraqesin një risk potencial të evazionit fiskal, si dhe në mos regjistrimin e punonjësve, ndërsa u bëri thirrje që të mos e sfidojnë shtetin.
