Drejtoria e Përgjithshme e Shërbimeve të Transportit Rrugor njoftoi sot qytetarët se lejedrejtimi dhe leje qarkullimi ndërkombëtar mund të tërhiqen edhe te zyrat e DRSHTRR Tiranë, pranë Qendrës së Kolaudimit të Mjeteve (ish-Nsharaku).
Kjo përbën lehtësi për qytetarët, pasi reduktohen radhët ndërsa deri tani këto dokumente tërhiqeshin në DRSHTRR Tiranë në Kashar, ku qytetarët mund të drejtohen ende për të marrë shërbimin.
Sipas zyrtarëve të kësaj drejtorie, kjo masë shmang radhët dhe kursen kohën për qytetarët në këto ditë të nxehta.
Dokumentacioni i nevojshëm për aplikim është: Leje drejtimi kombëtare/Leje qarkullimi kombëtare, dokument identifikimi, 2 fotografi.
Leje drejtimi ndërkombëtare dhe leja e qarkullimit ndërkombëtar janë të vlefshme për 3 vite dhe kanë një tarifë 500 lekë.