Deputeti dhe juristi Ulsi Manja duke folur në studion e Report Tv pas votimit kundër arrestimit të Saimir Tahirit, tha se e vendos prokurori i çështjes kohën kur do shkojë të kontrollojë banesën e ish-ministrit.
“Është çështje strategjie e prokurorëve që kanë çështjen. Nuk e dimë kush është prokurori që po bën veprimet me dosjet.
Me të marrë vendimin e zbardhur nga Kuvendi, shkon sot a nesër e cakton Prokurori që ka hetimin, e çmon ai dhe vendos ose pushon çështjen ose e çon në gjykatë në përfundim të hetimeve, e jep Prokuroria një përgjigje juridike për deputetin Tahiri”, tha Manja i cili shtoi:
“Tani shpresojmë që palët të presin të vërtetën nga drejtësia, nuk e presim të vërtetën nga opozita. Këto janë institucionet e drejtësisë që kemi. Opozita dhe sot demonstroi që ka hall pushteti, hall kuvendi opozita i ka bërë shërbim të madh çështjes Tahiri se me ato pankarta provoi se motivimi politik për të arrestuar Tahirin ka qenë i orkestruar politikisht. Pankartat shkojnë në dëm të drejtësisë, nga praktika e deritanishme, çështje të bujshme kur ka qenë të veshura me politikë kanë dështuar në gjykatë”, u shpreh deputeti i PS.
