– “Ka vetëm një institucion që cakton datën e zgjedhjeve në Republikën e Shqipërisë”,- tha Ilir Meta. Por, ai nuk e ka bërë këtë, madje tregoi se as që ka ndërmend që ta bëjë, ndaj nuk mund të jetë më, President i kësaj Republike.
– “Shqipëria nuk ka Gjykatë Kushtetutese”- tha Ilir Meta. Ai nuk mund ti japi të drejtë vetes që ta zëvendësojë atë. Ndaj nuk mund ti gjykojë siç bëri sot në konferencën e shtypit të orës 08.00, por vetëm ta zbatojë vendimin e Kolegjit Zgjedhor për 30 Qershorin.
– “E anullova datën e zgjedhjeve që të nxisja dialogun”,- tha Ilir Meta, me ironinë e një njeriu që është koshient se nëpërmjet saj, ka nxitur veç dhunën.
– “Do të thërras tryezën e dialogut, pasi të tërhiqet qeveria…”,- tha Ilir Meta. Njësoj se Monika, Saliu dhe Luli që thonë “ose ikën Edi Rama, ose shkrihet opozita!”
– “Nga institucioni i Presidentit do të fillojë ringritja e Republikës”,- tha Ilir Meta. Njësoj si “Republika e Re” e Lulzim Bashës, që është “Republika e rrugës”.
– “Shqipëria nuk është koloni e një fondacioni ndërkombëtar”, tha Ilir Meta, duke nënkuptuar si gjithë të singjashmit e vet autokratë në Europë, “Soros”-in. Pas “poliagjentit” Edi Rama, tani na qenka zbuluar edhe armiku i jashtëm. Rroftë shoku Enver Hoxha i pluralizmit… Urraaaa…
– “Zgjedhjet janë vetëm të organizatës socialiste dhe Presidenti nuk ndërhyn në punët e brendshme të partive”,- tha “durimadhi” Ilir Meta. Duke demonstruar se tashmë është në krye të lëvizjes antisistem të “Opozitës së Bashkuar” në rrugë.
Ilir Meta të paktën u tregua i sinqertë në një pikë. Kur pranoi indirekt se nuk e ndalonte dot më 30 Qershorin.
Ndaj pas kësaj, nuk ka pse qëndron asnjë minutë më tepër në atë zyrë, e të flasi në emër të Republikës së Shqipërisë.
Qoftë esëll ose jo, Ilir Meta ka rënë.
E bashkë me të edhe modeli i Presidencës së tij.
