Një ngjarje e denjë për film aksion u regjistrua ditën e djeshme në zonën e ish-kënetës në Durrës. Një makinë tip “Range Rover” qëllua me breshëri plumbash që nga Maminasi.
Fillimisht doli informacioni se është plagosur Julian Meçaj, një nga ushtarët e Lul Berishës, ish-kreut të bandës së Durrësit.
Njëri prej të plagosurve është edhe Plarent Dervishi, kunati i Lul Berishës. Dervishi mori 1 plumb ndërsa Meçaj 3, por të dy janë jashtë rrezikut për jetën.
Dëshmitarët okularë shprehen se ndjekja zgjati për rreth 20 minuta.
Referuar sërish personave në vendngjarje, në mjetin që qëlloi drejt Range Roverit, ndodhej një person i maskuar dhe shoferi.
Mendohet se drejt makinës me të cilën ata udhëtonin u derdhën dy karikatorë kallashnikovi.
Albeu.com mëson se në momentin që ka ndodhur atentati ndaj Dervishajt dhe Meçes, drejtimin e makinës e kishte ky i fundit, ndërsa Dervishaj gjendej si pasagjer. Kanë qenë manovrat e Meçes që i kanë shpëtuar të dy nga kurthi që kishin ngritur atentatorët, të cilët bënë që t’i rezistonin sulmit prej 20 minutash nga Maminasi në hyrje të Durrësit.
