Pas qëndrimit që kryeministri Edi Rama ka mbajtur me gazetarët pas seancës së sotme plenare, ku u rrëzua kërkesa e Prokurorisë së Krimeve të Rënda për arrestimin e ish-ministrit Tahiri, të njëjtin shqetësim ka shprehur edhe ky i fundit. Pasi ka lënë sallën e Parlamentit, pas fjalës së shkurtër drejtuar kolegëve, deputeti Saimir Tahiri i është drejtuar banesës së tij. Por aty ka vënë re praninë e kamerave dhe gazetarëve, që në fakt për shkak të ndjeshmërisë së madhe publike që ka kjo çështje, kanë qenë në raportim të vazhdueshëm.
E me sa duket ky fakt e ka shqetësuar jo pak ish-ministrin, i cili u ka kërkuar gazetarëve të mos qëndrojnë para shtëpisë, pasi shqetësojnë familjen e tij.
“Pse rrini këtu akoma? Nuk kam asgjë për të folur”, u tha Tahiri gazetarëve.
Gazetari Klajdi Bodlli thotë se pas vendimit të sotëm të Kuvendit, pritet edhe qëndrimi i Prokurorisë për të proceduar me kontrollin personal dhe të banesës së ish-ministrit të Brendshëm.
