Teksa Partia Demokratike dhe kreu i tyre, Lulzim Basha vijon takime nëpër qytetet e Shqipërisë, Lëvizja Socialiste për Integrim, nga ana tjetër, ka nisur takimet me partnerë duke shpalosur kështu edhe një program për punën që ata synojnë të bëjnë.
Edhe pse vijojnë me qëndrimet e tyre duke mos u përgjigjur thirrjeve nga ana e qeverisë dhe nga ndërkombëtarët për dialog në mënyrë që të gjendet një zgjidhje për zgjedhjet lokale, Partia Demokratike dhe Lëvizja Socialiste për Integrim po vijojnë takimet si në një fushatë të zakonshme elektorale.
Së fundmi LSI ka mbledhur një tryezë diskutimi për programin e tyre në Bujqësi. Në këtë takim pjesmarrës ishin zv.kryetari i LSI, Luan Rama, nënkryetari Petrit Vasili, disa prej ish-deputetëve si dhe ekspertet italiane të frutikultures Dr.Francesco Tagliani dhe Dr. Luca Gambarotto.
Nga ana tjetër edhe kreu i opozitës, Lulzim Basha në takimet e zhvilluara deri më tani nuk ka lënë pa përmendur programet elektorale të PD-së ku sipas tij do të zbatohen sapo të vijnë në pushtet.
Nuk dihet nëse LSI dhe PD po përgatiten për ndonjë lëvizje në ‘minutat e fundit’ për tu futur në zgjedhje, pasi programet që ata po shpalosin janë mirfilli programe elektorale.
Megjithatë kujtojmë se më 2 qershor opozita ka thirru protestën e radhës para kryeministrisë.
