Një nga “mitet e rreme” më të përhapura nga opozita jonë jashtparlamentare, është ajo që i lidh protestat e saj, me përpjekjet për ti hapur rrugën integrimit të vendit.
KU DUKET KJO: Më 2 maj 2019, Lulzim Basha nga Elbasani gjatë një proteste deklaroi: “Do i japim të rinjve perspektivën e Shqipërisë si e gjithë Europa. Në këtë vend, që nuk i mungon asnjë resurs, por mungon ligji dhe kushtetuta. Kjo betejë ka transformuar Shqipërinë në një mënyrë përfundimtare dhe themelore. Ne jemi maxhoranca sociale dhe morale në vend. Ne do ti japim fund tranzicionit të tejzgjatur dhe për të hapur rrugë integrimin në Europë.”
ALIBIA: Lidershipi i PD, LSI dhe aleatëve të tyre , pretendon se i dogjën mandatet e deputetëve, dolën nga Parlamenti e sistemi politik i vendit dhe e firmosën marrëveshjen për të mos hyrë në zgjedhje, sepse me mënyrën si po qeveris Edi Rama, Shqipëria po shkon në të kundërt të axhendës së integrimit në BE.
DJE KOMISIONERI HAHN: “Shqipëria ka çuar përpara reformat, veçanërisht një transformim të madh të sistemit të Drejtësisë, përfshirë një proces të paprecedentë rivlerësimi të gjyqtarëve dhe prokurorëve. Vendi ka bërë përpara me reformat, veçanërisht në fushat e përcaktuara nga Këshilli në Qershor 2018. Për këtë arsye Komisioni Europian i rekomandon Këshillit hapjen e bisedimeve tani, me Shqipërinë. Që të mbetet i besueshëm, BE duhet ti përmbahet angazhimeve të veta e t’u përgjigjet qartë e pozitivisht, kur vendet përmbushin detyrimet e tyre”.
DJE, LULZIM BASHA: “Ramën e kanë njoftuar se Këshilli Europian në qershor do votojë për mos hapjen e negociatave. Është një lajm ndëshkimi për çdo shqiptar, ndëshkim i pamerituar që ka një fajtor, një emër, Edi Ramën dhe qeverinë e tij antieuropiane”.
MINISTRI GJERMAN PËR EUROPËN/ Micahel Roth: “Opozita shqiptare, në mënyrë të përsëritur ka zgjedhur të transmetojë imazhe të dhunshme, në vend të angazhimit konstruktiv në konkurrencën politike të ideve me qeverinë në Parlament, nga i cili ata kanë zgjedhur të largohen. Kjo politikë penguese dhe e papërgjegjshme, nuk duhet të na verbojë nga ajo që po bën vendi. Fakti mbetet që Shqipëria ka bërë një përparim të qartë drejt BE-së”
PËRFUNDIMI: I vetmi kontribut që mund të japë opozita për integrimin e Shqipërisë, është që ajo të sillet si të gjitha opozitat e tjera të vendeve anëtare të BE. Që do të thotë, të rikthehet në Parlament, të futet në zgjedhje, të debatojë e të konkurojë në mënyrë konstruktive nëpërmjet programeve, platformave e ideve politike. Të tjerat, janë thjeshtë një “mit i rremë”, për të gënjyer qytetarët e këtij vendi.
/AlpeNews.al
