Alfred Peza
Sa më shumë i afrohemi ditës së zgjedhjeve të Përgjithshme Lokale të 30 Qershorit, aq më agresive bëhet dhuna verbale e opozitës dhe medias pranë saj mbi mazhorancën qeverisëse dhe opinionin publik,
Kjo dhunë është pjesë e strategjisë për ta detyruar qeverinë që të pranojë devizën e opozitës: “Ose Edi Rama do largohet, ose opozita do shkrihet!”.
Lidershipi i opozitës jashtparlamentare as ka kërkuar, as po kërkon dhe as ka për të kërkuar gjë tjetër veç kësaj.
Që do të thotë, se strategjia e saj është: Të iki Rama, e të vijmë ne! Pra me pak fjalë: Pushtet në tavolinë.
Strategjia e dhunë verbale, nëpërmjet propogandës dhe medias e rrjeteve sociale, ngrihet mbi tri kolona:
1.- Kërcënimet.
2.- “Fake news”-et.
3.- Mitet e rreme.
Gjuha e kërcënimeve është një mënyrë jetese dhe kulturë e të funksionuarit të fajtorëve, humbësve dhe të të dobtëve.
“Fake News”-et ose lajmet e rreme bazohen mbi të pavërtetat e pastra, ose gjysëm të vërtetat që janë gënjeshtra edhe më të mëdha.
Mitet e rreme janë më të kamufluara dhe ajo që mund të bëjë më shumë dëm për turbullimin e opoinionit.
“Miti është bindje apo besim kolektiv që nuk bazohet në fakte. Përdorimi i termit zakonisht shoqërohet me legjendën, fantazinë, folklorin të dhënat konfuze, dëshirat personale dhe legjendat urbane”.
Çdo të vertete, çdo fakti dhe argumenti të mazhorancës, opozita dhe mediat pranë saj po i kundërvihen me mite të rreme.
Në këto kushte, nga sot do mundohem që çdo ditë të evitentoj “mitet e rreme të 30 Qershorit” që dhe të ofroj faktet nga realiteti bazuar në dokumenta dhe të dhëna burimore.
