Ashtu si ishte paralajmëruar një ditë më parë, një grup studentësh protestuan mëngjesin e sotëm para Ministrisë së Arsimit.
Shpejt, u kuptua se në të vërtetë nuk ishin studentët e vërtetë të auditoreve por të rinjtë e forumeve partiake, pra të PD dhe LSI.
Thënë kjo, pasi të pyetur nga AlpeNews.al studentët u shprehen se mësimi sot ka vijuar normalisht dhe se nuk ishte fare e qartë as protesta as se kush e organizonte.
Një prej studenteve të arkitekturës u shpreh se vetem një dite me parë kishte marr njoftimin nepermjet posterit (foto meposhtë), por kishte zgjedhur të shkoj në mësim.
“Personalisht mendoj se protesta u thirr nga të rinjte e partive. Nuk do ishte hera e parë prandaj zgjodha te mos shkoj”.
Nga ana tjetër, një student i Fakultetit të Shkencave Sociale u shpreh për AlpeNews.al:
“Ne mbështesim çfarëdolloj organizimi që vjen nga masa studentore dhe artikulon problemet në thelb të tyre, duke filluar që nga cilësia infrastrukturore e deri te Ligji i Arsimit të Lartë. Për protestën e sotme ne e kemi marrë vesh vetëm nga rrjetet sociale dhe te fakulteti ynë nuk ka pasur asnjë komunikim për të. Ne zhvillojmë asamble të herëpashershme në fakultet dhe aty i marrim vendimet, ndryshe nga të tjerë që bëjnë postime në internet dhe presin që studentët t’i ndjekin nga pas.
Protesta e dhjetorit kishte artikulim mirëfilli social e politik dhe ishte e pastër, kjo besoj dallohet nga masiviteti dhe mënyra e të folurit. Ne nuk kishim nevojë të përdornim dhunë e as të shanim apo të ulërisnim. Forca jonë ishte ideja e një universiteti të ri dhe mjeti për ta arritur ishte pjesëmarrja demokratike në vendimmarrje e shumicës studentore. Do punojmë në vazhdim për riorganizim, por kjo kërkon kohë dhe klima partiake është ende e qelbur”.
Përgatiti: AlpeNews.al
