Siç ishte parashikuar, sot në mbledhjen e parlamentit do të votohet me votë të fshehtë, hapja rrugë apo jo për arrestimin e deputetit Saimir Tahiri, sipas kërkesës së Prokurorisë së Krimeve të Rënda. Kjo kërkesë erdhi pas bërjes publike të dosjes Habilaj, e bandës së narko-trafikantëve, ku pas zbardhjes së përgjimeve përmenden njerëz me pushtet, dhe emri SAIMIR. Sipas hetimeve paraprake, Saimiri ishte transportuesi, dhe shoferi i kamionit, raporton alpenews.al. Në mbledhjen e Këshillit të Mandateve, Rregulloreve dhe Imuniteteve pati përplasje mes palës paditëse dhe ish ministrit të Brendshëm socialist, ku ky i fundit i kërkoi Prokurorisë vënien në dispozicion të provave që posedonte, pasi disa prej tyre, apo shumica tashmë ishin bërë publike. Palët politike janë ndarë në tre fronte: Ata që presin që drejtësia të thotë fjalën e saj, ata që e akuzojnë dhe duan ta shohin pas hekurave, dhe ata të cilët “e marrin në mbrojtje” duke thënë se Prokuroria ka vepruar gabim dhe shkelje flagrante me ligjin. Pas këtyre Tahiri “u zhvesh” nga të gjitha funksionet brenda Partisë Socialiste. Tahiri ka bërë publike një dokument të ardhur nga Katania e cila vërtetonte se ndaj tij nuk kishtë nisur asnjë procedim penal. Sot për Tahirin do të bëhet një votim i fshehtë që do të vendos “fatin” e tij juridik. Sepse fati i tij politik, u vendos më parë nga Kryetari i PS dhe Kryeministri Edi Rama /AlpeNews.al/
