Kryetari i PD-së Lulzim Basha po zhvillon një vizitë në Britani të Madhe ku ka marrë një tjetër thirrje të fortë nga ndërkombëtarët që të ulet në bisedime pa kushte me kryeministrin Edi Rama. Pas takimeve me Konservatorët, Basha ka zhvilluar një takim në mesditë në orën 14:00 me Andrew Page, që është drejtori për Ballkanin Perëndimor në Britaninë e Madhe.
Burime për Report Tv pohojnë se qëndrim i tij ishte i prerë se duhet të ulet në negociata me kryeministrin Edi Rama pa parakushte, përndryshe zgjedhjet e 30 Qershorit do të njihen edhe sikur të gjitha bashkitë të fitohen nga PS.
Lideri demokrat Lulzim Basha ka deklaruar më parë nuk do të ulet në dialog me Edi Ramën kryeministër, por sot mori një tjetër goditje në Britani pas atyre nga të gjitha kancelaritë e rëndësishme europiane, por edhe SHBA-së që palët duhet të ulen në dialog për të gjetur zgjidhjen për kapërcimin e krizës politike prej tre muajsh.
Opozita ka paralajmëruar protestën e radhës më datë 25 maj, ndërsa nuk do të marrë pjesë në zgjedhjet lokale, madje duke paralajmëruar se do i bllokojë, por sipas të gjitha gjasave situata pritet që të ndryshojë pas presionit ndërkombëtar kundër opozitës që të lerë protestat e dhunshme dhe të ulet në tryezë për dialog.
