Derbi i së dielës mes Partizanit dhe Tiranës po konsiderohet si ndeshja më e rëndësishme e Superligës për këtë sezon, pasi dy skuadrat kërkojnë të marrin pikë me patjetër për objektivat që kanë. Partizani në rast fitoreje shpallet automatiskiht kampion pas 26 vitesh, ndërsa 3 pikët për Tiranën do të thonin shumë për mbijetesën, por edhe për historinë negative që kanë në derbi vitet e fundit.
Por në këtë përballje skuadrat e kryeqytetit vijnë ndryshe jo vetëm në objektivat që kanë, por edhe në marrëdhëniet me tifozët. Për shkak se Tirana është skuadra mike në këtë sfidë dhe tribuna D2 e “Selman Stërmasit” është mbyllur për arsye sigurie, mbështetësit më të zjarrtë të skuadrës, “Tirona Fanatics” kanë vendosur të mos jenë prezent në derbi. Në rrjetet sociale ata kanë njoftuar për bojkotin:
“Fanatics nuk do të jenë prezent në ndeshjen e rradhës, të dielën kundër morrave. Besojmë se nevojë për sqarime nuk ka, edhe njeherë tjetër refik halili dhe qeraxhinjtë e tij mund ti zgjidhin vet ndarjet e “Dhomave” te “Shtepisë Me Qera”, intelekti i tifozëve bardhë e blu qendron shumë lart tyre. Forca Tirona!”
Në kampin kundërshtar, te Partizani, situata paraqitet krejt e kundërta. Që të enjeten klubi ka njoftuar se janë shitur më shumë se gjysma e biletave dhe se te tribunat B1, B2 dhe E biletat kanë mbaruar. Masiviteti i tifozave të kuq për këtë ndeshje vihet re edhe në rrjetet sociale, aty ku kanë nisur organizmet prej ditësh. Gjithashtu në këtë sfidë qe me shumë mundësi pritet të lë shenjë në historinë e Partizanit priten tifozë edhe nga jashtë kufinjve, si Maqedonia dhe Kosova.
