Policia ka shoqëruar ish-deputetin demokrat Luçiano BoçI dhe 15 anëtarë të PD pasi ditën e sotme bllokuan rrugën në Bradashesh, për të ndaluar kalimin e kreut të qeverisë Edi Rama.
Një grup protestuesish të udhëhequr nga ish-deputetët Luçiano Boçi, Edmond Spahi dhe Endri Hasa u stacionuan në mes të rrugës duke sjellë bllokimin në trafik të automjeteve, jo vetëm makinave të vogla por edhe autobusëve me pasagjerë.
Forcat e policisë së Elbasanit, të mbështetura edhe nga Forcat e Ndërhyrjes së Shpejtë, mundën të shpërndajnë turmën e protestuesve duke hapur rrugën. Megjithatë, gjatë gjithë kohës pati përpjekje për të dalë sërish në rrugë. Kur eskorta e kreut të qeverisë po mbërrinte, turma u revoltua teksa nuk mungoi edhe hedhja e shashkave. Por FNSH dhe policia, nën drejtimin e kreut të bluve të Elbasanit Albert Nushi, mundësuan kalimin pa probleme të eskortës.
Në pamjet e transmetuara Live në Facebook e Partisë Demokratike, shihej se si ish-deputetët dilnin para autobusëve duke mos lejuar kalimin e tyre. Në vendngjarje ishin edhe forcat zjarrfikëse ndërkohë që situata u tejkalua pa përplasje të mëdha.
