Kryeministri i Kosovës, Ramush Haradinaj, i cili ka kryer një vizitë në Detroit SHBA, është pyetur për taksën 100 për qind ndaj produkteve serbe dhe boshnjake, për të cilën shumë zëra në Kosovë dhe jashtë saj thonë se po “minon” miqësinë me SHBA-të.
Në një intervistë për “Zërin e Amerikës”, Haradinaj tha se është ushtar i Amerikës, por i zbaton urdhrat siç e parasheh terreni. “Populli shqiptar i takon botës që e udhëheq Amerika. Marrëdhënia e Kosovës me Serbinë është e ndjeshme, se kemi pas luftë e tragjedi. Qëndrimet tona në lidhje me Serbinë dhe Rusinë janë të qarta dhe të ngjashme si ato që i ka Amerika ndaj tyre..”, tha Haradinaj.
I pyetur për taksën, Kryeministri i Kosovës u përgjigj se, “Unë jam njeri i terrenit si ushtari i Amerikës në terren, unë i zbatoj urdhrat, por i zbatoj si e parasheh terreni. Besoj se duke forcuar Kosovën, forcojmë interesin amerikan dhe largojmë interesin rus dhe të tjerëve”.
Haradinaj e dha intervistën pas takimeve me përfaqësuesit e komunitetit shqiptar atje. “Kanë bërë një organizim që është për respekt. Kujtuam ditën e kryengritjes së Malësisë së Madhe, po edhe ditën e flamurit. Pra, urime të gjithëve këtë ditë krenare”, tha Haradinaj. Kjo është vizita e parë e Ramush Haradinajt si Kryeministër në SHBA.
Haradinaj ka vizituar njërën nga kompanitë më të suksesshme të Detroit, “Bedrock”, ku partnerë teknologjikë në ndërtim janë edhe dy shqiptaro-amerikanë me origjinë nga Kosova, Etrit dhe Edi Demaj. Ai deklaroi se qeveria do të jetë partner konstruktiv në çdo mundësi dhe projekt për zhvillim ekonomik të vendit.
