Kryeministri izraelit Benjamin Netanyahu ka thënë se do të aneksojë vendbanime hebraike në Bregun Perëndimor të pushtuar nëse ai rizgjidhet.
Izraelitët shkojnë në votime të martën dhe Z. Netanjahu po konkurron për votat me partitë e krahut të djathtë që mbështesin aneksimin e një pjese të Bregut Perëndimor, shkruan BBC.
Vendbanimet janë të paligjshme sipas ligjit ndërkombëtar, megjithëse Izraeli e kundërshton këtë.
Muajin e kaluar, SHBA-ja njohu lartësitë e okupuara të Golanit si territor izraelit, lartësi të pushtuara në vitin 1967.
Izraeli ka vendosur rreth 400,000 hebrenj në vendbanimet e Bregut Perëndimor, me 200,000 banorë të tjerë në Jerusalemin Lindor. Janë rreth 2.5 milionë palestinezë që jetojnë atje.
Palestinezët duan të krijojnë një shtet në Bregun Perëndimor të okupuar, Jerusalemin Lindor dhe Rripin e Gazës.
Palestinezët thonë se prania e vendbanimeve e bën një shtet të pavarur në të ardhmen të pamundur.
Izraeli thotë se palestinezët e përdorin çështjen e vendbanimeve si pretekst për të shmangur bisedimet e drejtpërdrejta të paqes.
