Kryebashkiaku i ishullit të famshëm grek dëgjon zërin e animalistëve dhe merr vendimin në mbrojtje të veshëgjatëve që përdoreshin si taksi në ishull.
Dihet që Santorini, ishulli i bukur grek, ka shumë shkallë e pjerrësi. Për këtë, prej shumë vitesh turistët që dyndeshin nga e gjithë bota, përdornin veshëgjatët si taksi për të lëvizur në ishull. Por vit pas viti, gomarët dobësoheshin e turistët sa vinin e shëndosheshin. Eshtë kjo arsyeja që shoqata të ndryshme animalistësh, duke parë stërmundimet e veshëgjatëve, kanë luftuar me këmbëngulje për të drejtat e tyre. Më në fund, është lajm i këtyre orëve, kryebashkiaku i ishullit grek ndalon ngarkesat e veshëgjatëve me mbi 100 kg, duke hequr kështu të drejtën e turistëve mbipeshë të lëvizin me kafshët që vuanin. Ndoshta të bëjnë disa shkallë më shumë, u bën mirë edhe turistëve.
