Kryeministri i Greqisë, Alexis Tsipras, ka nisur të martën një vizitë historike në Maqedoninë e Veriut, e cila është e para e një lideri grek, që kur vendi ka shpallur pavarësinë në vitin 1991.
Tsipras ka përmbushur në janar një marrëveshje për t’u dhënë fund mosmarrëveshjeve me vendin fqinj për shkak të emrit, të cilat zgjasnin prej tri dekadash. Tashmë të dyja vendet po përpiqen që të forcojnë marrëdhëniet mes tyre, me Kryeministrin grek që ka shkuar në Shkup me dhjetëra biznesmenë grekë.
Me mbërritjen e Tsipas, homologu i tij maqedonas, Zoran Zaev, ka bërë bashkë me të një “selfie” përpara ndërtesës së qeverisë. “Kryeministri i parë i Greqisë që viziton Maqedoninë e Veriut. Një ditë vërtet historike”, ka shkruar ai në “Twitter”.
Kryeministri grek u shoqërua nga 10 ministra dhe më shumë se 100 liderë grekë të biznesit. Duke shkruar për foton “selfie” që ai ka bërë me Tsipras, Kryeministri maqedonas, Zaev, iu referua “momenteve të lumtura për një të ardhme akoma më të lumtur për popujt e vendeve tona mike”.
Të dy kryeministrat kanë nënshkruar një sërë marrëveshjesh përpara se të mbajnë një konferencë të përbashkët për mediat. Zaev foli për homologun e tij, duke iu referuar si një “mik i ngushtë personal”.
Marrëveshja hyri në fuqi në shkurt, pas ratifikimit nga të dy parlamentet. Tsipras tha se vizita historike filloi me kalimin e Autostradës së Miqësisë, emri i të cilit u ndryshua nga autostrada Aleksandri i Maqedonisë në shkurt 2018, si pjesë e përpjekjeve për të përmirësuar marrëdhëniet.
Grekët e kishin akuzuar fqinjin për përpjekjen për të përvetësuar trashëgiminë historike të Aleksandrit të Madh. Zaev tha se do të kishte përfitime të mëdha ekonomike nga marrëveshja me Greqinë.
Të dy udhëheqësit thirrën këshillin e parë të bashkëpunimit midis fqinjëve dhe ata ranë dakord të hapnin një kalim të dytë kufitar. Por Tsipras pranoi se një pjesë e konsiderueshme e popullit grek ishte ende është shumë e shqetësuar për këtë çështje. Një sondazh i opinionit në fund të muajit të kaluar sugjeroi që 73 për qind e grekëve nuk ishin dakord me marrëveshjen e Prespës.
Tsipras tha se ai dhe Zaev kishin një përgjegjësi për të treguar se si të dy vendet mund të ndërtonin besimin reciprok dhe të përfitonin nga marrëveshja e re. Të dy udhëheqësit janë përballur me opozitë të vështirë politike, për shkak të marrëveshjes.
