Ngrohja dhe ndryshimi i shpejtë në Arktik, duket se është kthyer në një normalitet te ri, e nuk ka më shenja për një rikthim në rajonin e ngrirë të së kaluarës. Konstatimi bëhet nga administrata e Arktik Report Card, që çdo vit paraqet gjendjen e mjedisit në zonë. Drejtori i programit, Jeremy Mathis thotë se rajoni i kishte shërbyer shumë planetit, duke vepruar si frigorifer.
‘Por ne e kemi lënë të hapur derën e frigoriferit’-pohon ai. Mathis foli në konferencën vjetore të Unionit Amerikan të gjeofizikës në Neë Orleans, ku prezantoi të dhënat e fundit mbi gjendjen e arktikut. Në raportin e saj të 12 administrata konfirmon se rajoni nuk do të qëndrojë në gjendjen e tij të ngrirë si në të kaluarën. Alarmant sipas shkencëtarëve është fakti se Arktiku po ndryshon më shpejt se kurdoherë tjetër në histori. Shpejtësia e ndryshimit sipas Mathish, po e bën shumë të vështirë përshtatjen e njerëzve.
“Fshatra po përmbyten në arktikun amerikano-verior duke krijuar refugjatët e parë të klimës”,pohon studiuesi, i cili përmend gjithashtu rritjen e nivelit të deteve për shkak të ngrohjes së Arktikut, shumë më shpejt nga sa ishte parashikuar një dekadë më parë. Ekspertët mendojnë se ndryshimet klimaterike të shkaktuara nga dora e njeriut po kontribuojnë në ngrohjen e arktikut dhe kthimin e tij në një rajon me dinamik.