Sot, në nivel global sipas Forumit Ekonomik Botëror, rezultati i hendekut mes gjinive qëndron në nivelin 68%. Kjo do të thotë, se mbetet ende 32% e këtij hendeku për t’u plotësuar, sipas një raporti të vitit të fundit të kryer në 149 shtete të botës. Një gjë e tillë, dëshmon se pabarazia ndërmjet grave dhe burrave është ende e madhe. Ajo që duhet thënë, është se asnjë shtet në botë nuk e ka arritur ende barazinë e plotë dhe se vetëm shtatë shtete në botë kanë mbyllur thuajse 80% të hendekut. Progreset e bëra drejt barazisë së plotë vazhdojnë të jenë tepër të ngadalta.
Pabarazia gjinore vazhdon të mbetet një sfidë e rëndësishme edhe në Bashkimin Evropian, për të gjitha shtetet anëtare, sipas studimit më të fundit të Institutit Evropian për Barazinë Gjinore. Gratë janë tepër të pa-përfaqësuara në nivele të larta vendimmarrëse në shumicën e shteteve anëtare. Pavarësisht faktit se gratë përbëjnë thuajse gjysmën e fuqisë punëtore në BE dhe përbëjnë mbi gjysmën e të diplomuarve me profil në sektorin e shërbimeve, proporcioni i grave të përfshira në nivelet e larta të vendimmarrjes mbetet tepër i ulët. Kjo anomali dëshmon çuarjen dëm të burimeve njerëzore tepër të kualifikuara dhe me njohuri të larta.
Edhe në Shqipëri, situata nuk është më e begatë. Sipas Instat, ndonëse hendeku gjinor i pjesëmarrjes në tregun e punës ka pësuar një ngushtim, gjatë vitit që lamë pas rreth 18 për qind më pak gra të moshave 15-64 vjeç ishin në tregun e punës krahasuar me burrat.
Në vendimmarrje, në pozicione të qeverisjes vendore, vetëm 15% e kryebashkiakeve janë gra, në nivel qendror 46% e ministrave janë gra, ndërsa në parlament gratë përbëjnë vetëm 29% të deputeteve, sipas raportimeve për vitin 2018.
Sipas llogaritjeve, për vitin 2017, Indeksi i Pabarazisë Gjinore ishte rritur në 0,14 nga 0,09 që shënonte një vit më parë. Në Shqipëri shkalla e pjesëmarrjes në tregun e punës është 50,0% për gratë; ndërkohë që është 67,0% për burrat.
Sipas Programit për Zhvillim të Kombeve të Bashkuara Prodhimi i Përgjithshëm Bruto për frymë për gratë në Shqipëri është 9,702 dollarë në vit, ndërkohë që për meshkujt është 14,028 dollarë në vit.
Sipas “The Global Gender Gap Index 2018”, Shqipëria renditet në vendin e 34-t në botë nga 149 shtete, me vetëm 29.3% të grave që janë të punësuara në nivele menaxhimi të ulëta apo të mesme.
Por për fat të mirë, ka gjithnjë përjashtime dhe histori të një suksesi të atillë, që është mirë që të bëhen publike, për të frymëzuar qindra dhe mijëra institucione, subjekte, gra dhe vajza, se me vullnet dhe mbitëgjitha punë, rezultatet në fund shpërblejnë.
Një histori shpresëdhënëse për rolin e grave në Shqipëri, është ajo e grupit Balfin, një Grup me “diskriminim” në kuptimin pozitiv, ku peshorja anon ndjeshëm në favor të grave dhe vajzave, pasi shumica e punonjësve janë femra dhe mbi gjysma e shoqërive të Grupit drejtohen prej tyre falë përvojës që kanë në sektorë të ndryshëm të sipërmarrjes, si ai financiar, tregtia e mallrave me pakicë, transportet dhe logjistika, pronat e patundshme dhe menaxhimi i tyre, turizmi e kështu me radhë.
Vetëm në sektorin e Real Estate/turizmit, 3 nga 4 drejtuesit ekzekutivë të Balfin janë gra.
Në këtë Grup 42% e anëtarëve të Bordit Drejtues dhe 48% e drejtuesëve të lartë në tërësi janë gra.
Ndërkohë që në nivel Grupi në tërësi, nga të punësuarit në total, Grupi Balfin ka plot 55% gra, ku vetëm shoqëria më e re e Grupit, Tirana Bank, 75% të totalit të punonjësve i ka gra.
Në disa kompani të këtij Grupi, si për shembull Green Coast, apo Fashion Group Albania, përqindja e femrave drejtuese është 80% në raport me atë të meshkujve, ndërkohë që te kompani si Jumbo apo Dyqan Taxi, raporti është përkatësisht 54% dhe 63% në favor të grave drejtuese.
Biznesi është një fushë që gëlon, dhe sikurse ka thënë Eleonor Roosevelt “Një grua është si një qeskë me çaj, nuk mund ta dish se sa e fortë është, deri kur e vendos në ujë të nxehtë”.
Balfin duket si një ishull i izoluar lumturie në një mjedis global, i cili sikurse treguam më lart, duket mjaft më i ashpër dhe jo fort dashamirës ndaj grave.
Sigurisht, është lidershipi largpamës dhe vizioni i Presidentit të Grupit, Z. Samir Mane, ai që mundi të krijonte në Shqipëri një klimë biznesi të udhëhequr nga gratë, kjo mbi të gjitha edhe për arsye racionale, sepse rezultatet tregojnë që kështu suksesi është i garantuar!
Ne kemi pyetur 10 gra të niveleve të larta drejtuese të Grupit Balfin, ato janë imazhi dhe puna që qëndron pas suksesit të Grupit.
