Mësuesit dhe Policët duket se nuk do të përfitojnë shpërblim për festat e fundvitit. Ministria e Financave i tha zyrtarisht gazetës “Shqiptarja.com”, se deri më tani nuk është parashikuar shpërblim për këto kategori.
Mësuesit
Për mësuesit duhet një fond i konsiderueshëm për të dhënë shpërblimin për festat e fundvitit, për shkak se bëhet fjalë për më shumë se 36 mijë arsimtarë. Për këtë shkak thanë burimet nga Ministria e Financave, nuk është parashikuar ende shpërblimi, pas mungojnë fondet.
Për këtë arsyje ekspertët e financave po mendojnë shpërblimin e mësuesve më të mirë gjatë 2017-së, për t’ju dhënë një pagë. Edhe një vit më parë qeveria shpërbleu vetëm 400 mësuesit më të mirë në të gjithë vendin.
“Ende nuk është zyrtarizuar, por për mësuesit dhe policët mungojnë fondet për shpërblimet e fundvitit. Por gjithsesi qeveria do të vendosë në ditët në vijim”, – thanë burime nga Ministria e Financave.
Policët
Më shumë se 11 mijë policë nuk do të marrin shpërblim për festat e fundvitit. Burimet nga Ministria e Financave sqarojnë se nuk është parashikuar shpërblim për policët në fondin prej 1.8 miliardë lek, i cili do shkojë për dhënien e 3 mijë lekëve, pensionistëve dhe shtresave në nevojë.
Edhe Ministria e Brendshme nuk ka bërë propozim për t’ju dhënë pagë shtesë ose shpërblim oficerëve të Policisë për festat e fundvitit. Ashtu si një vit më parë pritet të marrin shpërblim vetëm policët që janë vlerësuar me certfikata për shërbime të dalluara.
Gjithsesi do të jetë qeveria e cila do të vendos, në momentin që do miratohen shpërblimet për pensionistët she shtresat në nevojë. Deri më tani të ardhurat shtesë në buxhetin e shtetit nuk mbulojnë edhe dhënien e shpërblimeve për pensionistët. Në vitin 2015 oficerët e Policisë morën 5 mijë lekë të reja shpërblim, ndërsa një vit më parë përfituan rreth 200 polic të cilët kishin marrë certifikata për vlerësime në punë.
Vendimi për shpërblimet e fundvitit pritet të miratohet nga qeveria në mbledhjen e ardhshme të Këshillit të Ministrave, por deri më tani oficerët e Policisë nuk parashikohet të përfitojnë./Shqiptarja.com
