Gjermania ka nevojë për së paku 260,000 punëtorë emigrantë të rinj në vit deri në 2060-ën, për të përmbushur mungesat e tregut të punës të shkaktuara nga rënia demografike.
Në këtë përfundim ka arritur një studim i botuar këtë të martë nga Fondacioni Bertelsmann, i cili thekson se nga ajo shifër, 146,000 persona çdo vit do të duhet të emigrojnë nga vendet jo-anëtare të BE-së.
Si pasojë e plakjes së popullsisë, forca e punës në Gjermani vlerësohet të tkurret me një të tretën, ose rreth 16 milionë njerëz deri në vitin 2060, pa përfshirë emigrimin.
Në mungesë të emigracionit, hendeku në tregun e punës mund të ketë një ndikim shkatërrues në ekonominë e katërt më të madhe në botë.
Studimi vlerësoi se 114,000 njerëz do të emigrojnë nga vendet anëtare të Bashkimit Europian, por faktorët demografikë dhe konvergjenca ekonomike brenda 28 vendeve anëtare, do të ulë nxitjen e punëtorëve që të shkojnë në Gjermani.
Jörg Dräger, drejtor ekzekutiv i Fondacionit Bertelsmann, vuri në dukje se shifrat zyrtare treguan se vetëm 38,000 punëtorë erdhën dhe qëndruan në Gjermani në vitin 2017.
“Gjetjet e studimit sugjerojnë se Gjermania duhet të miratojë me shpejtësi ligjin e emigracionit, për të tërhequr punëtorë me aftësi të mesme dhe të larta, si dhe për të zhvilluar programe më të fuqishme të integrimit, deklaroi ai.