Martesa me mblesëri dhe me një burrë shumë më të madh se vetja, e detyruan një 26-vjeçare që të largohej nga Shqipëria dhe të kërkojë azil në Angli. Kjo është historia e Daniela Prengës, e cila përmes një pasaporte false shkoi në Britani të Madhe në vitin 2015. Tashmë ajo është zbuluar se ka përdorur dokumente të rreme.
26-vjeçarja aktualisht është e martuar dhe ka një fëmijë 2 vjeç, ndërsa është në pritje të fëmijës së dytë. Avokati i Danielës ka thënë se ajo rrezikonte të dhunohej në Shqipëri. Një burrë në moshë ishte projektuar për t’u bërë bashkëshorti i saj, martesë të cilën Daniela e refuzonte. Dhe e vetmja mënyrë për ta bërë këtë, ishte të braktiste vendin e saj.
Ajo shkoi fillimisht në Hungari, ku u pajis me një pasaportë false. Identiteti ishte i rremë, por fotografia dhe shenjat e gishtave ishin të Daniela Prengës. Avokati i shqiptares argumentoi se 26-vjeçarja rrezikon nëse do të kthehet në Shqipëri, ndërsa në Britani ka krijuar tashmë edhe familjen e saj.
Vet Daniela e pranoi se kishte përdorur dokumente të rreme, të cilat i duheshin për të lindur në maternitet dhe për të marrë patentën. Ajo ishte dëbuar njëherë nga Anglia, por ishte rikthyer në vitin 2016 me pasaportën false.
Pasi shqyrtoi rastin e saj, gjykata vendosi dënim 90 ditë punë në komunitet për Daniela Prengën.
