Ministri i Jashtëm serb, Ivica Daçiç, e quajti provokim praninë e ministrit tonë Gent Cakaj, duke e lidhur me faktin që ai është nga Kosova. Që në fillim të mbledhjes me Ministrat e Jashtëm të Bashkimit Evropian, Daçiç tha: “Kosova ka dy ministra të Jashtëm në këtë takim. Ky është një provokim i Edi Ramës kundrejt nesh. Pse Kosova të ketë dy ministra të Jashtëm?”.
Pas deklaratës së tij erdhi edhe reagimi i ministrit Cakaj: “Në fakt zoti ministër Ivica Daçiç ju duhet të ishit skandalizuar më parë, pasi Kosova i ka pasur dy ministra të Jashtëm gjithmonë dhe siç thotë një fjalë e urtë, ‘Nuk ka dy, pa tre’. Ju jeni nga Prizreni dhe përfaqësoni këtu Serbinë, kurse unë jam shqiptar nga Kosova dhe përfaqësoj Shqipërinë”. Pas deklaratës së tij në sallën nisën të qeshurat, ndërsa ajo që tha Cakaj nënkuptonte se në atë mbledhje në fakt Kosova përfaqësohet nga tre ministra, përfshirë Daçiçin.
