Kryeministrja britanike Theresa May iu bëri kërkesë deputetëve këtë të martë të mos e prishnin strategjinë e saj , e cila synon që Britania të ketë një të ardhme sa më të mirë.
May tha se ishte koha që parlamenti të “fliste si një”.
Ajo shtoi gjithashtu se: ”Bëjmë këtë dhe ne mund të lëmë BE-në me një marrëveshje që nderon rezultatin e referendumit. Kështu ka ardhur koha që fjalët të përputhen me vepra. Nëse doni t’i tregoni Brukselit se çfarë do të pranojë kjo Dhomë, ju duhet të votoni për të. Nëse dëshironi të dilni me një marrëveshje, ju duhet të votoni për të. Nëse doni Brexit, ju duhet të votoni për Brexit”.
May ka deklaruar se do të vazhdojë planet për marrëveshjen, por do të kërkojë disa ndryshime për të fituar mbështetjen e nevojshme.
“Sot ne mund dhe duhet të përqendrojmë të gjitha përpjekjet për të siguruar një marrëveshje të mirë me BE-në që të na mundësojë të largohemi në mënyrë të qetë dhe të rregullt më 29 mars”, tha zonja May në Parlament.
Një propozim ka të bëjë me njërin ndër shqetësimet më të mëdha të atyre që kundërshtojnë marrëveshjen. Ata nuk pranojnë një dispozitë e cila e mban Britaninë në një bashkim doganor me Bashkimin Evropian, për të siguruar një kufi të hapur midis Irlandës së Veriut dhe anëtares së BE-së, Irlandës.
Partia konservatore e May po mbështet tani ato që ajo i quan “masa alternative” për të kapërcyer shqetësimet rreth lidhjes së politikave të Britanisë me rregullat e BE-së.
Nuk është e sigurt nëse këto ndryshime do të ishin të mjaftueshme për të fituar miratimin në parlament.
Ndërkohë aleatët besojnë që një votim i plotë nga deputetët do to ti japë fuqinë May që të shkojë në Bruksel dhe të bëjë deklerata që mund të kënaqin Brexiteers.
May u shpreh që kjo nuk do të jetë mundësia e fundit për të vendosur në lidhje me marrëveshjen Brexit.
Por nëse nuk arrihet marrëveshje e re më 13 shkurt, kryeministrja do të bëjë një deklaratë në parlament atë ditë dhe do të paraqesë një mocion të ndryshueshëm për debat një ditë më pas.
