Studentë të Fakultetit të Drejtësisë deklaruan sot se Rektori i Universiteti të Tiranës, Mynyr Koni nuk i dha zgjidhje situatë së krijuar te Fakulteti i Drejtësisë, që qëndron i bllokuar nga një grup individësh.
“Unë isha një nga studentët që mora pjesë te mbledhja e senatit që u zhvillua dje, dhe isha te mbledhja që u zhvillua sot në Fakultetin e Drejtësisë ku erdhi Rektori i Universitetit të Tiranës, Mynyr Koni. Rektori mbajti një qëndrim shumë burokratik, po na shpaloste kompetencat që ka, por nuk na thoshte se çfarë mund të bënte me këto kompetenca për të zgjidhur situatën. Ishte i varur nga takimi që priste të zhvillonte me studentët e ngujuar. Ne shkuam te rektorati me shpresën për të marrë informacion për takimin mes rektorit Koni dhe studentëve të ngujuar, por ai u largua me arrogancë”, tha një student i Fakultetit të Drejtësisë për ATSH.
Studentët thanë për Agjencinë Telegrafike Shqiptare se Rektori Koni nuk u takua me studentët e ngujuar për t’i bindur të lirojnë godinën siç premtoi një ditë më parë dhe që mësimi të rifillojë. Sipas studentëve, Rektori Koni nuk mori masa as për të mundësuar zhvillimin e mësimit në një godinë tjetër, kërkesë e propozuar nga studentët e Juridikut dhe nga dekanati.
“Zero, asnjë produkt. Ne jemi këtu ku jemi duke u konfliktuar me njëri tjetrin, me shokët tanë dhe me njerëz që nuk janë fare studentë dhe askush nuk po merr asnjë masë. Nëse Rektori i Universitetit të Tiranës do ta mendonte si zgjidhje, atë që ne bashkë me dekanatin e Fakultetit të Drejtësisë i propozuam, për të zhvilluar mësim diku tjetër, ai do kishte firmosur që ne të hënën ose që nesër të fillonim mësim në një godinë tjetër. Por kjo nuk ka ndodhur akoma, ai nuk ka komunikuar as me studentët brenda godinës, as me studentët të cilët shkuan te rektorati me shpresën për të rifilluar mësimi”, tha për Agjencinë Telegrafike shqiptare një studente e Juridikut.
